Tregtarët e karburanteve akuzojnë qeverinë për shkelje të rregullave të konkurrencës dhe marrëveshjeve ndërkombëtare.Autoriteti i Konkurrencës i rekomandon qeverisë të shfuqizojë vendimin ku lejon vetëm Armo-n të tregtojë D2

Autoriteti i Konkurrencës e konsideron vendimin e qeverisë, i cili i jep të drejtë kompanisë Armo të tregtojë naftën e cilësisë D2, në kundërshtim me rregullat e konkurrencës së tregut. Ky autoritet i rekomandon ekzekutivit të shfuqizojë vendimin, pasi ai prish konkurrencën në tregun e hidrokarbureve në vendin tonë.

Qeveria, në korrik të këtij viti, me vendimin numër 1110 lejon tregtimin e naftës së cilësisë D2, e cila nxirret nga vendburimet që ndodhen në territorin e Republikës së Shqipërisë, produkt që tregtohet vetëm nga kompania e privatizuar Armo. Ndërkohë që, në mars të vitit të kaluar qeveria shqiptare miratoi një vendim “Për cilësinë e lëndëve djegëse, benzinë dhe diezel”, nëpërmjet të cilit, duke nisur nga 1 janari i vitit 2009 ndalonte shitjen e këtij produkti nga kompanitë e importit dhe tregtimit të karburanteve në Shqipëri.

Ky vendim i Këshillit të Ministrave ndalonte tregtimin e naftës D2, pavarësisht nëse kjo është me origjinë vendase apo e importuar, për arsye që lidhen kryesisht me mbrojtjen e mjedisit. Por, me vendimin e këtij viti, nga ky kufizim u përjashtua prodhimi vendas, i cili përpunohet dhe tregtohet nga shoqëria Armo.

Qeveria i ka dhënë afat kësaj shoqërie tre vjet për të reduktuar sasinë e squfurit në karburante. Ky vendim ngjalli reagimin e Shoqatës së Hidrokarbureve, përfaqësues të së cilës gjatë seancës dëgjimore me krerët e Autoritetit të Konkurrencës kërkuan nisjen e një hetimi ndaj këtij vendimi, pasi sipas tyre thyente rregullat e konkurrencës së ndershme në treg.

Përfaqësuesit e saj kërkuan gjatë takimit të fundit të vitit të kaluar ndërhyrjen e menjëhershme dhe ligjore për të rregulluar tregun dhe për të vënë në pozita të barabarta konkurrence të gjitha subjektet e licencuara në importimin e tregtimin e lëndëve hidrokarbure. Ata ishin thirrur në një seancë dëgjimore për të shpjeguar pozicionin e tyre në treg, pasi sipas një hetimi të autoritetit, ky treg karakterizohej nga kufizimi i konkurrencës,gjë që ndikonte në mbajtjen e çmimeve në nivele të larta.

Por, nga të akuzuar, tregtarët e mëdhenj të karburanteve u shndërruan në akuzues dhe fajësuan qeverinë për shkelje të këtyre rregullave. Ekspertët e Konkurrencës shqyrtuan vendimin e qeverisë dhe nëpërmjet një njoftimi zyrtar të bërë publik për mediat, i rekomandojnë asaj të shfuqizojë vendimin nr. 1110, i cili lejon tregtimin e naftës së nxjerrë në Shqipëri dhe ndalon importin e D2-shit nga operatorët e tjerë të tregut.

Shoqata e Hidrokarbureve e ka dërguar këtë vendim edhe në Gjykatën Kushtetuese, duke kërkuar shfuqizimin e tij. Sipas tyre, vendimi i korrikut të vitit 2008, përveç rregullave të tregut shkel edhe marrëveshjet me Organizatën Botërore të Tregtisë dhe Marrëveshjen e Stabilizim Asociimit dhe Marrëveshjen e Përkohshme, e cila ka hyrë në fuqi që me 1 dhjetor 2006.

Tregu i D2-shit

Në tregun shqiptar konsumohen rreth 400 mijë ton naftë e cilësisë D2. Nga kjo sasi, rreth 300 mijë importohet nga kompanitë dhe 100 mijë hidhen në treg nga kompania prodhuese Armo. Përfaqësuesit e kompanive importuese pretendojnë se me vendimin 1110, shoqërisë Armo do t’i kalojë automatikisht edhe pjesa prej 75% e tregut, që zotërohet nga këta operatorë, pra kompania do të zotërojë 100% të tregut të naftës së cilësisë D2. Importuesit thonë se me këtë vendim mund të falimentojnë, megjithëse çdo vit derdhin deri në 260 milionë euro si detyrime fiskale.

Popularity: 28% [?]