Kryetari i PD-së, Berisha, sulmoi dje nga Shkodra, kryetarin e opozitës, Edi Rama

Shkodër – Kryetari i PD-së, Sali Berisha, prezantoi dje në Shkodër, kandidatët e këtij qarku.

Gjatë fjalës së tij, Berisha përmendi, sipas tij, rritjen ekonomike në vend, krijimin e klimës së favorshme për biznesin, duke premtuar ndërkohë edhe 24 orë ujë në çdo fshat. “Ju premtoj se në katër vitet e ardhshme do të bëj që të paguheni më mirë seç paguhen qytetarët e 6 vendeve të BE-së.

Për fermerët shkodranë ju premtoj subvencionimin e investimeve në vreshta e ullinj, që ato të dalin në tregun evropian me prodhimet e tyre, si qytetarë evropianë”,- tha ai. Berisha bëri thirrje për pajisjen e qytetarëve me karta identiteti.

Ashtu si edhe në tubimet e tjera, Berisha iu drejtua sërish kryetarit të opozitës, Edi Rama. “Shkodra, ku ti ishe para pak ditësh të pret, se zemrën e ka të hapur, ka pluralizëm politik.

Shkodra të fal ty për kundërshtimin në Parlament të ligjit për dënimin e krimeve të komunizmit. Shkodra të fal ty për votimin kundër në Parlament të ligjit për kompensimin e ish-të përndjekurve politikë.

Por Shkodra ka një kusht me ty: respekto atë që e citove dy ditë më parë, Hilë Mosin, respekto oksidentalizmin e Shkodrës.

Shkodra të kërkon ty të dalësh në krye të listës tënde, të kërkon të mos fshihesh e të mos kesh frikë, ndryshe fundi yt do të jetë i njëjtë me atë të etërve tuaj. I citove Shkodrës Hilë Mosin, por i servire Tom Doshin, lavdërove Padër Gjergjin e Luigj Gurakuqin dhe i servire kryetrafikantin.

Por Shkodra do të flasë vetë. Unë të them se nuk të urrej, pasi nuk jam njeri që urrej dhe urrejtja nuk bën pjesë në shpirtin tim. Ti më nderon që më urren, por përgjigjen do e marrësh si në 1992-shin e 2005-ën dhe tani në 2009-ën”, – tha Berisha.(Shekulli)

Popularity: 1% [?]