TIRANË- I menjëhershëm ka qenë edhe reagimi i Ministrisë së Brendshme, lidhur me deklaratën e ashpër të Sekretarit për Çështjet Zgjedhore në PS, Kastriot Islami.

Zëdhënësi i kësaj Ministrie, Fatmir Konja, deklaroi dje se, lista përfundimtare e zgjedhësve është një listë e hartuar dhe e konfirmuar zyrtarisht nga çdo kryetar, i çdo njësie të qeverisjes vendore.

“Është e vërtetë që në listat e zgjedhësve ka një numër qytetarësh me moshë mbi 100 vjeç, por për sa kohë ata ligjërisht janë shtetas, që nuk janë deklaruar të vdekur nga familjarët e tyre, siç e parashikon ligji, askush nuk mundet t’i fshijë ata nga Regjistri Kombëtar i Shtetasve.

Duket krejt i paarsyeshëm pretendimi i Partisë Socialiste për të konsideruar të vdekur çdo shtetas që ka mbushur moshën 90 vjeç”,- tha Konja. Ai theksoi se lista e plotë e të gjithë shtetasve pa pasaportë, që do të mbeten pa aplikuar, do të bëhet publike vetëm pas datës 15 qershor.

“Në lidhje me procesin e pajisjes së qytetarëve me letërnjoftimin elektronik, Ministria e Brendshme sqaron edhe njëherë opinionin publik, forcat politike dhe të gjithë aktorët e interesuar, se pas datës 15 qershor, sapo të mbyllet procesi i aplikimeve për të gjithë qytetarët pa pasaportë, do të dërgohet pranë Komisionit Qendror të Zgjedhjeve dhe forcave politike të interesuara, lista e plotë e të gjithë shtetasve që kanë aplikuar për letërnjoftimin elektronik, si dhe lista e plotë e të gjithë shtetasve pa pasaportë që do të mbeten pa u paraqitur për të aplikuar”,- tha ai.(Shekulli)

Popularity: 1% [?]