Një numër i madh liderëve të forcave politike në Maqedoni do të vazhdojnë të mbeten edhe për një vit në listën e zezë në Amerikë.

Ata janë: Kryetari i partisë “Të Bashkuar për Maqedoninë”, Ljube Boshkovski, kryetari i Partisë Demokratike Shqiptare Menduh Thaçi, anëtari i kryesisë qendrore të BDI-së, Xhevat Ademi, ish-komandant Hoxha – Xhezair Shaqiri, kryetari i Iliridës Nevzat Halili, deputeti i pavarur Daut Rexhepi, kreu i AKSH-së Gafurr Adili, Kastriot Haxhirexha, Izair Samiu, Sait Rushiti, Avdyl Jakupi-Cakalla, Xhavit Hasani, Xhemajl Hiseni dhe Nuri Bexheti.

Sipas Shtëpisë së Bardhë këta persona ndodhen në listën e zezë për shkak të aktiviteteve ekstremiste në Republikën e Maqedonisë. Po sipas administratës amerikane këta persona asistojnë, sponsorizojnë ose mbështesin dhunën në Maqedoni dhe në mbarë Ballkanin Perëndimor.

Në këtë listë gjenden edhe shumë persona nga vendet e tjera të rajonit që rrezikojnë zbatimin e plotë të Marrëveshjes së Daytonit dhe të rezolutës 1244 për Kosovën.

Për herë të parë lista e zezë amerikane u publikua më 26 janar të vitit 2001. Futja në listën e ‘Listën e zezë’ nënkupton bllokimin e hyrjes së këtyre personave në territorin amerikan si dhe ngrirje të fondeve të institucioneve financiare amerikane.

Pjesë e kësaj liste ka qenë edhe kryetari i Bashkimit Demokratik për Integrim Ali Ahmeti. Por në vitin 2003, me vendim të administratës së presidentit George Bush, emri i tij u hoq nga lista e personave që promovojnë ekstremizëm.

Deri tani kjo listë ka pësuar disa herë ndryshime.

Vendimi i presidentit amerikan Barack Obama për vazhdimin e sanksioneve është vendosur edhe në faqen zyrtare të internetit të Shtëpisë së Bardhë.(Shekulli)

Popularity: 1% [?]