Pezullim mësimi në zonat që janë të bllokuara nga bora. Ky është vendimi i fundit i marrë nga ministria e Arsimit dhe Shkencës, e cila përmes një njoftimi lajmëron ndërprerje të procesit mësimor në zonat problematike. Sipas burimeve nga MASH-i mësohet se pezullimi i mësimit do të zgjasë për tre ditë.

Kështu duke nisur nga dita e sotme, në qarkun e Dibrës që përfshin qytetet Bulqizë dhe Mat, në rrethet Mirditë dhe Librazhd, mësimi do të ndalë për 3 ditë në të gjitha shkollat, kjo e kushtëzuar si nga moti i ashpër, ashtu edhe nga terreni i vështirë në këto zona.

Qarku tjetër ku janë marrë masa për mbylljen e shkollave është ai i Kukësit, ku bëhet e ditur se mësimi do të pezullohet vetëm në shkollat pranë komunave, ndërsa mësimi do të vazhdojë pranë bashkive të Bajram Currit dhe Hasit. Nga njoftimet që vijnë nga Drejtoritë Arsimore,situatë e rënduar atmosferike është vënë re edhe në rrethin e Pukës.

Për këtë arsye, MASH ka vendosur që mësimi në këtë rreth të zhvillohet vetëm në qytetet Pukë e Fushë-Arrëz, ndërsa në të gjitha komunat e këtij rrethi mësimi do të ndërpritet për 3 ditë.

Sipas vendimit, mësimi që do të humbasë gjatë këtyre ditëve do të kompensohet ditëve të shtuna, por për këtë do të njoftohen drejtoritë përkatëse, të cilat më pas do të sinjalizojnë edhe nxënësit.

Sot shumë komuna janë të izoluara për shkak të reshjeve të borës, ndërkohë që shumë akse rrugore janë të bllokuar, e të tjera janë të kalueshme vetëm me zinxhirë.

Popularity: 33% [?]